बम

(आजभन्दा करिब ६ वर्षअगाडि देशमा व्याप्त राजनैतिक परिस्थितिको सेरोफेरोमा रहेर लेखेको कविता हो यो मेरो । परीक्षाको कारण बढ्दै गएको बेफुर्सदीले गरेर म तपाईँहरूलाई मेरा पुराना कविताहरू अबको केहि समय पस्किने जोहो गर्दैछु । मेरा बालकविताहरू स्वीकारिदिनु होला ।)

जिन्दगीमा नसुनेको कुरा सुनेँ मैले
पानी खाने गाग्री पनि बम भयो अहिले
पुत्ला पनि बम अरे रकेट पनि बम
तुल पनि बम अरे सकेट पनि बम

जहाँजहाँ फोहोरको हुन्छ डमाडम
त्यहीँनेर पड्किदिन्छ प्रेसर कुकुर बम
एउटै घरका परिवार घम्साघम्सी लडे
पेट्रोल बम गाडिभित्र यात्री सबै डढे

विकास भो जताततै बाल्टीन पनि बम
केहि दिनमा हुन्छ अब लाल्टीन पनि बम
हाम्रो देश नेपालमा शान्ति छाउँछ कहिले
भएभरका भाँडाकुँडा बम भए अहिले

झुल बम तुल बम फूल बम फले
राम्रा राम्रा घरअफिस खरानी भै बले
क्रान्ति फाल्न गाह्रो पर्‍यो हामी सबैलाई
बम पाल्न साह्रो पर्‍यो हाम्रो देशलाई !!