भावपूर्ण श्रदाञ्जलि इन्द्र लोहनीज्यूप्रति

.

"जय होस !" अब यी शब्द कहिल्यै पनि सुनिने छैन कान्तिपुर टेलिभिजनको लोकप्रिय कार्यक्रम 'कान्तिपुर बहस'का प्रस्तोता इन्द्र लोहनीको मुखबाट । जनताको हक र अधिकारका विषयलाई उठाएर ठूला ठूला व्यक्तिका अगाडि अब ठाडा र घोचक प्रश्न सोध्ने छैनन् उनले । 'जनताले बुझ्ने भाषामा भनिदिनोस् न' भनेर कसैलाई पनि भन्ने छैनन् अनि कोशीपीडितलाई जस्तो हेलिकप्टरबाट डोरी लगाएर तल झरेर उद्धार गर्न पनि पुग्ने छैनन् इन्द्र लोहनी । हाम्रो दुनियाँ र उनकै आफ्नो दुनियाँलाई पनि चटक्कै छाडेर यस धर्तीबाट विलिन भए हाम्रा प्यारा इन्द्र लोहनी । पत्रकारिता जगतले मात्र नभएर समग्र राष्ट्रले नै अर्को एउटा ठूलो घाटा बेहोर्नुपरेको छ आज ।

नेपाल टेलिभिजनमा 'बहस' कार्यक्रम चलाउँदा नै चर्चाको शिखरमा आएका इन्द्र लोहनीले त्यहाँबाट निष्कासित भएपछि कान्तिपुर टेलिभिजनबाट 'बहस'लाई "कान्तिपुर बहस"को नामबाट निरन्तरता दिएका थिए । ठाडा ठाडा प्रश्न सोधेर ठूला ठालुलाई पनि अक्क न बक्क पार्ने उनको कार्यक्रमका बारेमा थाहा नपाउने कमै थिए होलान् । मलाई धेरै मनपर्ने मान्छे थिए उनी । मलाई लाग्थ्यो म पनि यस्तै हुन पा'को भए !!

दिउँसो तीन बजेसम्म आफैँ गाडि ड्राइभ गरेका लोहनीलाई छातीमा अप्ठ्यारो भएपछि करिब ८.10 मा नर्भिक अस्पताल पुर्‍याइएको रहेछ तर डाक्टरले उनको २० मिनेट अगाडि नै हृदयघातको कारण मृत्यु भएको जानकारी दिएछन् । आज मलाई एकदमै नरमाइलो लागेको छ उनको मृत्युको खबर सुनेर................. र योभन्दा धेर लेख्‍न पनि मन लागेन । अहिलेलाई यहिँ बिट मारेँ ल । भावपूर्ण श्रद्धाञ्जलि इन्द्र लोहनीज्यूप्रति !!!