"बल्ल नेपाल स्वीट्जरल्याण्ड भयो !"

"बल्ल नेपाल स्वीट्जरल्याण्ड भयो !" काठमाण्डौ विश्वविद्यालय अगाडि फोटोकपी पसल सञ्चालन गर्ने रमेश दाइले यसो भन्दा अचम्म लाग्यो मलाई । के भएछ यी दाइलाई, कहाँ नेपाल स्वीट्जरस्याण्ड भएको देखेछन् भनेर दङ्ग परेँ म त । एमाले र कांग्रेसले सदन वहिष्कार गरेर सदनै नचल्ने भाको छ । राजतन्त्रको उन्मुलन गर्ने जनआन्दोलनको विजारोपण भएको दिन टुटेफुटेका पार्टीका बन्दले देश मन्द मन्द हुँदैछ । केराको पातमा चिप्लिएर मर्दा दस लाख र क्षतिपुर्तिको माग गर्दै टायर बाल्दैछन् मान्छेहरू । देशमा कैयौँ गुमनाम प्रचण्ड थेवेहरूको हत्या भइरहेको छ दिनका दिन । मोबाइको कि-प्याड नै नचल्ने भइसकेको छ नेटवर्क नलागेर किचि किचि थिचिरहँदा । ४ दिनमा १ दिन त पक्कै पानी आउँछ भन्दै सरकार वीरता प्रस्तुत गर्दैछ । एकछिन सोचेँ, कसरी भयो होला त नेपाल स्वीट्जरल्याण्ड ?


अनि सोधेँ,"के भयो हौ रमेश दाइ ? कसरी नेपाल स्वीट्जरल्याण्ड भयो?" अनि रमेश दाइले बडो उल्लासका साथ उत्तर दिए "दिनभरि बत्ती आएपछि, नेपाल स्वीजरल्याण्ड भएन त?" एकछिन मजाले हाँस्यौँ दुवैजना । दुईचार दिनयता तापक्रममा वृद्धि हुँदै गएपछि हिउँ पग्लिएर खोलामा पानीको सतह बढेको र कल-कारखाना पनि बन्द र हड्तालका कारण बन्द रहेको कारण देखाउँदै विद्युत प्राधिकरणले जथाभावी(तालिका नै प्रकाशन नगरि) विद्युत आपुर्ति गर्दै आएको छ । यसबाट सामान्य नागरिक त खुसी भएका छन् नै झन् खुसी त रमेसदाइहरू भएका छन् जो दिनभरि फोटोकपी गरेर जीवनयापनको बाटो समाउँदै छन् । विद्युतीय उपकरणका साथै मर्मत र कम्प्युटरसम्बन्धी काम गर्ने व्यवसायी पनि दिनको १६ घण्टा लोडसेडिङ खेप्दै रूटिनबाहेक २-४ घण्टा बत्ती आइदिँदा साँच्चै नै स्वीजरल्याण्ड ठान्न बाध्य छन् नेपाललाई ।

बाहिर बस्ने मान्छेलाई त लाग्दो हो कसरी बस्छन् होला नेपालमा मान्छेहरू १६-१६ घण्टा लोडसेडिङ हुँदापनि ? तर सकिँदो रै'छ । टिभी नभई समय नकट्ने, ईन्टनेट नचलाई बस्न नसकिने हामीजस्ता मान्छे त जेनतेन चीत्त बुझाउँदैछौँ तर साना व्यवसाय भने नराम्ररी प्रभावित भएका छन् । २ दिनमा २०-२५ वटा किताब फोटोकपी गरिदिने रमेश दाइ अहिले एउटा किताब लिएर जाँदापनि बत्ती नआउने भएर एक हप्ता जति लाग्छ होला भन्नुहुन्छ । खोइ के गरेर समाधान हुने हो यो लोडसेडिङको समस्या ? नेपालमा उत्पादित बिजुलीभन्दा सस्तो भाउमा भारतले बिजुली बेच्ने प्रस्ताव गरेको छ भनेर समाचारमा आउँछ । त्यस्तो हो भने किन लिन ढिलाइ गरेको होला ? कि ल्याउन नहुने नै पो हो कि साँच्चै ? खोइ साँचो कुरा के हो नै थाहा पाउन सकिएन ।

जे होस् अहिले बत्ती जानेबेलामा पनि फ्याट्फ्याटि आइरको छ, रमेश दाइजस्तै हामीलाई पनि निरन्तर बत्ती आइरहे स्वीजरल्याण्ड यहि नै हो जस्तो लाग्न थालिसक्यो ॥