वास्तवमा परिवर्तनकारी रहेछन् माओवादी

अपडेट : भर्खरै बसेको व्यवस्थापिका संसदको बैठकमा माओवादी संसदीय दलका उपनेता नारायणकाजी श्रेष्ठले बोल्दै राष्ट्रपतिले माफी नमागेसम्म र रूक्माङ्गत कटुवाललाई नहटाएसम्म नागरिक सर्वोच्चता नरहने जिकिर गरे । साथै उनले सैनिक सर्वोच्चताको यो घडिमा नागरिक सर्वोच्चता स्थापना नभएसम्म सदन पनि चल्न नदिने र नयाँ सरकार पनि बन्ने नदिने धम्की सबै सभासद्लाई कान खोलेर सुन्न आग्रह गर्दै माओवादी सभासद्ले रोष्ट्रम घेराऊ गरे ।
**************************************************************************************************************
प्रचण्ड थैवको हत्या हुँदा नेकपा एमालेले सदन अवरूद्ध गर्यो । माओवादीका अध्यक्ष पुष्पकमल दाहालले ठूलो दु:ख व्यक्त गरे शान्तिप्रक्रियाप्रति एमाले गम्भीर भएन भनेर । आफ्नो बाह्रबुँदे लागु भएन भनेर अनि रूक्माङ्गत कटुवाललाई निकाल्नु हुँदैन भनेर कांग्रेसले सदन अवरूद्ध गर्यो । त्यतिबेला त प्रतिकारमै उत्रिए माओवादी सभासद् सदन अवरूद्ध गर्न पाईँदैन भनेर । संविधान निर्माणमा सबैले ध्यान पुर्याउनुपर्छ भनेर सबैलाई चेतना बाँड्दै हिँडे अनि वाईसिएल लगाउँदै जनता मार्दै हिँडे पर्दापछाडि । प्रचण्ड थेवेको हत्यारा सुजित विकलाई क्यान्टोन्मेन्ट हुँदै नेताको आश्रयमा राखे र देशमा दण्डहीनताको अन्त्य हुनुपर्छ भन्दै रट लगाउँदै हिँडे । आफ्नो समर्थक हुल्ने ठाउँ काहिँ नपाएर पशुपतिको पुजारीमा समेत आफ्ना मान्छे हुले र भारतबाट एउटा दुत आउनेबित्तिकै लुरूक्कै निर्णय फिर्ता गरे । कति परिवर्तनकारी हुन् त माओवादी !! कसैले यस्तो गरेको थियो सत्तामा पुगेर ?

हाम्रो मुख्य ध्येय भनेको संविधान निर्माण हो भन्दै हिँडे र अरु दलले संविधान निर्माणमा सहयोग नगर्दै सदन अवरूद्ध पारेकोमा दु:ख पनि व्यक्त गर्न भ्याए । सत्तामा हुँदा आफ्नो पार्टीजस्तो संविधान निर्माणमा कटिवद्ध कोही छैन भने झैँ गरेर बोल्न थाले । सानातिना बन्द र हड्तालले गरेर देश खत्तम भयो भन्दै त्यस्तो हड्तालको विपक्षमा उभिए । अनि जनतालाई लाग्यो ओहो ! माओवादी त साँच्चै परिवर्तनकारी शक्ति रै'छ । जनताको म्याण्डेटलाई बुझेको पार्टी भनेको माओवादी मात्रै रहेछ ।

दुई-चार दिन के यस्तो लागेको थियो जनतालाई अब सरकारबाट बाहिरिएपछि निरन्तर सदन अवरूद्ध र सडकबाट आन्दोलन थाल्ने निर्णय माओवादीको सचिवालयले गरेको छ । कस्तो परिवर्तनकारी रहेछन् त माओवादी ? देशलाई होइन शक्ति हत्याउनको लागि आफैँ सर्पले जस्तै काँचूली फेर्दै वास्तवमै पर्लक्कै परिवर्तन हुन सक्ने शक्ति रहेछन् माओवादी !!