उफ् यो मानसिकता!!

अराजकताको हद! नागरिकमा आज यसै शिर्षकमा छापिएको समाचार पढेर आफैँ देखि दिक्क लाग्यो । कुरो के रहेछ भने पुर्वाञ्चल क्षेत्रिय रंगशाला इटहरीमै बन्नुपर्ने माग राखेर स्यानीयबासीहरू सडकमै ओर्लेछन् । अनि त्यहि नेपालीको पुरानै शैलीमा चक्काजाम,बन्द, तोडफोड, आगजनी…………..उफ् मलाई त दिक्क लागिसक्यो यो मानसिकताप्रति ।

फोटोमा दनदनी बलिरहेको यात्रुबाहक बस देखेर खपीसक्नु रीस उठेन मलाई । एउटा खेलकुद मैदानको मुद्दामा यति ठुलो आवेग !आफ्नो माग सम्बोधन गराउन गरिने यस्ता आपत्तिजनक कृयाकलापप्रति हामी कतिसम्म अभ्यस्त भइसकेछौँ भन्ने कुराको पछिल्लो उदाहरण मात्र हो यो । स्वयमं जनताका नुन खाएका नेता भनाउदाको त शैली यहि छ भने जनताले पनि आखिर सिखो न गर्ने हो , तर व्यक्तिगतरूपमा मलाई अनि सायद अरू जो कसैलाई पनि यस्तो अराजक व्यवहार पक्कै मन पर्दैन ।

आफ्नो जन्मथलो पनि ईटहरी नजिकैको सानो गाउँमा भएको नाताले यो सहरसँग आत्मिय सम्बन्ध छ मेरो । आफू जन्मिएको ठाउँको बारेमा केहि राम्रा कुरा लेखौँ र अरूसामु इटहरीको चिनारी मज्जैले गराउँभन्ने मनमा लागिरहेको बेला हालसालै ईटहरीबासीले देखाएको यो कार्यशैलीले मेरो मनमा गहिरै ठेस पुगेको छ । त्यसो त सरकारले क्षेत्रिय रंगशालाको लागि बजेट छुट्याएको तर स्थान किटान नगरिसकेको अवस्थामा आफ्नै क्षेत्रमा रंगशाला बन्नुपर्नेकुरामा पुर्वाञ्चलका तीन ठुला सहर ईटहरी, धरान र ईनरूवा वीच दशैंताकानै घम्साघम्सीपरिरहेको थियो । आफुपनि ईटहरीबासी भएको नाताले सोही स्थानमा रंगशाला बन्नुपर्ने पक्षमा म पनि थिएँ त्यसबेला (हुनत अरू कारणहरू पनि ससक्त छन् यस विषयमा), तर हालसालैको यो घटनाले मलाई आफ्नै जन्मथलोप्रति वितृष्णा जगाएको छ । कुनै पनि माग बलजफ्ती र डरधम्कीले पुरा हुँदैनन् भन्ने कुरा सवैले वुझ्न जरूरी छ । यदि इटहरी उपयुक्त स्थल हो भने रंगशाला पक्कै यहिँ बन्नेछ हैन भने यो आन्दोलनको कुनै औचित्य छैन । यो त आफ्नै मुखमा कालो पोत्नु सिवाय अरू केही होईन । अनि आक्रोशित भएर अराजक गतिबिधि देखाउदा नयाँ पिढिमा साथै अन्तराष्ट्रिय जगत् मा पनि कस्तो सन्देश पुग्छ भनेर आत्मालोचना गर्नु उत्तिकै जरूरी छ ईटहरी बासीले।

photo source: nagariknews.com