अहिले बजारमा डिजेल,पेट्रोललगायतका पेट्रोलियम पदार्थको कृत्रिम अभाव छ । कारण, सरकारले छैठपछाडि पेट्रोलियम पदार्थको भाऊ बढाउँदैछ । सस्तो मुल्यमा ल्याएको पेट्रोलियम महङ्गो मुल्यमा बेच्न पाइने भएकाले जनतालाई बाँड्नभन्दा गोदाममा हालेर जोगाउन तम्सिएका छन् पेट्रोलियम बेच्ने व्यवसायीहरू । भारतमा पेट्रोलियम पदार्थको मुल्यमा समायोजन भएपछि अहिले भारतमा भन्दा नेपालमा डिजेल,पेट्रोलको भाऊ सस्तो छ । नेपालमा ग्यालिन बोकेर आएर भारत तेल ओसार्ने काम पनि धमाधम हुँदैछ सीमावर्ती नाकामा । यसैलाई न्युनिकरण गर्न र आयल निगमको घाटालाई कम गर्न सरकारले मुल्य समायोजन गर्ने भएको हो ।

अन्तराष्ट्रिय क्षेत्रमा कच्चा तेलको मुल्यवृद्धिसँगै भारतबाट आयात गर्दा तेल महङ्गो भएकाले पोहोर साल लामै समयसम्म पेट्रोलियम पदार्थको अभाव भएको थियो । अब भने एउटा खुसीको खबर छ नेपाल र नेपालीका लागि । केहि समयअगाडि पत्रिकामा आएको थियो पाल्पाका कृषकले सजीवनको तेलको प्रयोगले ट्रयाक्ट्रर कुदाए भनेर । त्यसैगरि काठमाण्डौ विश्वविद्यालयमा पनि केहि समय अगाडि भएको एउटा संयुक्त प्रोजेक्टले बायोडिजेलको मद्दतले नेपाल भ्रमण नै गरेका थिए । पश्चिम नेपालमा पनि सजीवनको तेलबाट ट्रक कुदाएको कुरा समाचारमा आएको थियो । बाहिर के के भएको छ कुन्नि, तर नेपालमै यो प्रमाणित भइसकेको छ कि सजीवनबाट निकालेको तेलबाट गाडि मजाले कुद्‍न सक्छ । केहि समयअगाडि तत्कालीन् विज्ञानमन्त्री गणेश शाहले पनि सजीवनको विरूवा लाहानमा रोपेको कुरा उहाँको ब्लगमा उल्लेख गरिएको छ ।

अब भने सजीवनको तेल व्यवसायिक रूपमा उत्पादन हुने भएको छ । एभरेष्ट बायोडिजेल नामक कम्पनीले चितवनमा २ बिगाहा जग्गा खरिद गरेर सजीवनको व्यवसायिक खेतीको शुरूवात गरिसकेको छ र छोटो समयमा नै तेल पेल्ने उपकरण र वायोडिजल प्रशोधन उपकरण जडान गर्ने भएको छ । डिजलप्रतिको परनिर्भरता हटाउन यो कार्यले नेपाल र नेपालीलाई एकदमै सहयोग गर्नेछ । सजीवन खेती गर्ने स्थान र स्रोत नेपालमा प्रशस्तै भएकाले यस उत्पादनलाई अन्तर्राष्ट्रिय बजारमा पनि लान सकिन्छ । आशा गरौँ अब तपाईँ हामीले नेपालमा गाडि चलाउँदा आफ्नै देशको सजीवनको तेलले गाडि चलाउन पाऔँ । यसले वातावरण पनि जोगाउँछ अनि आफ्नो पैसालाई देशबाहिर जान पनि दिँदैन । साथै पेट्रोलियमका लागि बाहिरि देशसँगको परनिर्भरता पनि हटाउनेछ ।

तस्वीर स्रोत : यहाँ छ

---

Post a Comment