नयाँ नेपाल ?

सुन्नुहोस् 'नयाँ नेपाल ?' कवि अनिल पौडेलकै आवाजमा :



फूलबारी धुवाँमय छ
पूजा कोठामा बारूद गन्हाउँछ
कोक्रोमा बम हल्लिन्छ
आमाहरू बङ्करभित्र
प्रश्रवपिडाले छट्पटाएका छन्
बिहान नजन्मी साँझ पर्छ

कुमारी दिनहरू

त्यसै ओइलाएर गएका छन्
अक्सिजनको मूल्य
मानव जीवन भन्दा महङ्गो हुन्छ
कि पानीभन्दा सस्तो हुन्छ ?
कामरेड प्रचण्डज्यू !
नयाँ नेपाल कस्तो हुन्छ ?

हात चूँडिएका शिक्षकहरू
चकको छेउमा उभिएका छन्
कक्षा कोठामा विध्यार्थीहरू
टायरको महत्व पढिरहेछन्
सुन फल्ने मलिलो भूमि
नागरिकको छालासँगै फाटिरहेछ
विखण्डनको खस्रो जिब्रोले
हाम्रो राष्ट्रियता चाटिरहेछ
भोलि
मान्छेको जीन्दगी
मृगको सुकुटीभन्दा महँगो हुन्छ
कि व्वाइलर कुखुरोभन्दा सस्तो हुन्छ
कामरेड झलनाथज्यू !
नयाँ नेपाल कस्तो हुन्छ?

नयाँ नेपालमा
थोत्रे वावुको घर हुन्छ कि हुँदैन?
नयाँ नेपालमा
बुढी आमाको थर हुन्छ कि हुँदैन?
हजुरवा हजुरआमालाई
नातीनातीनीको डर हुन्छ कि हुँदैन?

संविधान सभाको हल्ला
विस्तारै सेलाउँछ कि!
पार्टीका मुसालाई
ढाडेले खेलाउँछ कि!
राज्यको स्वरूप
थेप्चो हुन्छ कि चुच्यो हुन्छ?
नेप्टो हुन्छ कि वुच्चो हुन्छ?
देशको मानचित्र
टिष्टा र काङ्गडा जत्रो हुन्छ
कि वाईसे-चौविसे जस्तो हुन्छ?
ओ गिरिजाबाबु !
नयाँ नेपाल कस्तो हुन्छ?

फोटो स्रोत : मर्कन्टाइल कम्युनिकेसन