बारुलो

खिल भएको
विष भएको
अर्काको ज्यान लिने
रीस भएको
ज्यानी
खुनी
बैगुनी
कालो
निखूर कालो हुन्छ बारूलो ।

उस्तै प्वाँख उमारेर
खिल लुकाएर
घारको प्वालमा
शिर झुकाएर
स-गर्व आफूलाई सगोत्री भन्दै
माहुरीको घारभित्र पस्यो बारूलो
रानुको छेउमा वस्यो बारूलो ।

लोकल
मसिना
दुब्ला माहुरीहरू
फूलका थुँगा निमोठेर
बजार लाने व्यापारीको गाउँमा
रस चुस्न नपाएर वगरमा छरिएका
जंगली फूल खोज्दै
टाढा-टाढासम्म डुलेर थाकेका
टिठलाग्दा माहुरीहरू
आफू भोकै बसेर
चाकामा अलिकति मह चुहाएर
खडेरीमा सञ्चय गर्न
ताँती लागेका माहुरीहरू,
टुहुराको घारमा
विदुवाको कमाई खान
दक्षिणी प्वालबाट पस्यो बारूलो
पखेटा फिँजाएर बस्यो बारूलो ।